Anrhydeddu amrywiaeth o fewn yr Eglwys
Roedd yr ystafell gyfarfod yn Venue Cymru yn Llandudno yn llawn ar brynhawn y 15fed o Ebrill, gydag aelodau o Gorff Llywodraethol yr Eglwys yng Nghymru, staff cymorth, a'r wasg wedi ymgynnull ar gyfer y ddadl a oedd ar ddod. Marice Morgan, aelod lleyg etholedig dros Archddiaconiaeth Caerfyrddin, sy’n adrodd yr hanes
Yn 2021, roedd y Corff Llywodraethol wedi pleidleisio dros ganiatáu cyfnod prawf pum mlynedd ar gyfer gwasanaethau bendith ar gyfer priodasau a phartneriaethau sifil ar gyfer personau o'r un rhyw. Roedd y treial hwnnw i fod i ddod i ben ym mis Medi 2026, ac roedd y Bil oedd nawr gerbron y Corff Llywodraethol yn ceisio gwneud y ddarpariaeth yn un barhaol. Pwysleisiwyd o'r cychwyn cyntaf na fyddai unrhyw glerig yn gorfod gweinyddu gwasanaethau o'r fath, gan gydnabod yr amrywiaeth o safbwyntiau sy’n cael eu harddel o fewn yr Eglwys.
Agorodd yr Archesgob Cherry y sesiwn trwy roi amlinelliad o’r broses ac atgoffa'r aelodau, er bod disgwyl barn gref, y dylid cynnig a derbyn pob cyfraniad gyda pharch. Yna siaradodd yr Esgobion Gregory a Mary gydag emosiwn am eu profiadau bugeiliol gydag unigolion a oedd wedi cael eu niweidio gan agweddau negyddol tuag at eu rhywioldeb, gan esbonio pam mae Mainc yr Esgobion yn cefnogi'r Bil.
Cafwyd dadl fywiog ac eang iawn i ddilyn. Camodd llawer o aelodau ymlaen i rannu eu safbwyntiau, gan bwyso ar yr ysgrythur, ar ddiwinyddiaeth ac ar brofiad personol. Er gwaethaf dyfnder y teimladau, roedd yr awyrgylch yn parhau’n barchus a chwrtais, gyda'r aelodau yn gwrando'n astud ar ei gilydd. Roedd cynifer yn dymuno siarad nes i'r ddadl barhau tan 5.45pm. Gyda’r lleoliad wedi’i drefnu i gynnal cyfarfod ar gyfer rhai o arweinwyr y pleidiau gwleidyddol y noson honno, gohiriwyd y bleidlais tan fore trannoeth, gyda phawb yn gadael o dan fesurau diogelwch llym, a oedd yno ar gyfer y gwleidyddion.
Fe wnaethom ailymgynnull ar ôl brecwast fore trannoeth. Cefais fy nharo yn arbennig gan grynodeb ystyriol yr Esgob Gregory, lle cydnabu'r urddas a'r didwylledd a welwyd wrth i aelodau fynegi eu safbwyntiau gwahanol. Yna aethpwyd ati i bleidleisio yn ôl urdd—Lleygion, Clerigion, ac Esgobion—a chafodd ei basio ymhob un, sy'n golygu bod y Bil wedi'i basio.
Daeth y sesiwn i ben gyda’r Archesgob Cherry yn diolch i'r aelodau am y ffordd barchus y cynhaliwyd y ddadl, gan nodi pwysigrwydd cydnabod argyhoeddiadau ein gilydd hyd yn oed pan nad oes modd cytuno.
Gadewais yn teimlo bod y Corff Llywodraethol wedi mynd i'r afael â'r mater hwn gyda sensitifrwydd, gofal, ac awydd gwirioneddol i anrhydeddu'r amrywiaeth o fewn yr Eglwys.
Gellir dod o hyd i fanylion yr holl drafodion yng nghyfarfod y Corff Llywodraethol ym mis Ebrill yn: Pigion - Medi 2025 - The Church in Wales.