Taizé - Gweddïo trwy Gerddoriaeth, Gair a Thawelwch
Suzy Bale yn disgrifio noson gyda Ffrancwr ysbrydoledig
Ar 23 Ebrill, roedd Eglwys Sant Mihangel, Dafen, Llanelli wedi ei haddurno'n hyfryd ac yn llawn ar gyfer noson o weddi yng nghwmni’r Brawd Jean-Patrick o Gymuned Taizé yn Ffrainc.
Dechreuodd y noson gydag amser o weddi yn arddull Cymuned Taizé, sydd wedi’i lleoli ym Mwrgwyn, Ffrainc. Cymuned o Frodyr eciwmenaidd ydyn nhw, sydd wedi bod yn croesawu miloedd lawer o bererinion ac ymwelwyr ers degawdau. Mae'r weddi yn cynnwys caneuon neu siantiau o Taizé, adnodau syml o'r ysgrythur, o'r Salmau sy’n cael eu hailadrodd drosodd a throsodd, darlleniadau o'r Beibl, yna cyfnod o dawelwch.
Roedd yna foment arbennig iawn pan gyfarfu Frère Jean-Patrick a minnau â Bernard, sy'n byw ger Llanelli, ond a gafodd ei eni cwta filltir o Taizé, ac a fu’n gweddïo gyda'r brodyr yn blentyn ac, fel dyn ifanc, a helpodd i adeiladu Eglwys yr Atgyfodiad.
Ar ôl y weddi, cawsom luniaeth yn y neuadd a buom yn gwylio fideo am fywyd a gweddi yn Taizé. Bu’r Brawd Jean-Patrick yn sôn mwy wrthym am fywyd y Gymuned ac atebodd gwestiynau am y Gymuned, am weddi, ac am fynd ar bererindod i Taizé.
Yr hyn a greodd yr argraff fwyaf ar bobl oedd harddwch y gerddoriaeth a bod y gofod a’r distawrwydd wedi ein helpu ni i gyd a'n gwahodd i weddi.
Mae'r brawd Jean-Patrick yn hanu’n wreiddiol o Chennai (Madras) yn ne-ddwyrain India. Aduniad oedd y noson ar ystyr arall hefyd gan ei fod ef a minnau wedi bod yn wirfoddolwyr yn Taizé gyda'n gilydd dros ddeng mlynedd ar hugain yn ôl. Roedden ni mor ddiolchgar bod y Brawd Jean-Patrick wedi dod o hyd i amser ar ei daith pythefnos o ogledd yr Alban i dde Lloegr i ymweld â Chymru am y tro cyntaf.
Roedd llawer o bobl yn wirioneddol ddiolchgar am y noson hon gyda'n gilydd ac rydyn ni’n chwilio am bobl a lle a allai fod â diddordeb mewn ymgynnull yn fwy rheolaidd i gynnal Gweddi Taizé. Os hoffech gyfarfod i weddïo eto, neu os hoffech ymuno â ni, yna cysylltwch â thîm y weinidogaeth ym Mro Lliedi neu Fro Glannau Tywyn.