Dyfodol gwell i gartrefi gwledig

Dyma Benjamin Rwizibuka, o Bukavu, - esgobaeth bartner i ni yng Ngweriniaeth Ddemocrataidd y Congo, yn rhoi'r newyddion diweddaraf am brosiect uchelgeisiol, ac yn gofyn am ein cymorth

Prif amcan Congo Nature+ (CN+) yw galluogi aelwydydd gwledig i ymateb i’w hanghenion yn awr ac yn y dyfodol, megis ailgoedwigo a rheoli erydiad, rheoli adnoddau naturiol a phrif gnydau bwyd y rhanbarth er mwyn gwella cynnyrch a chynhyrchiant. Ein gweledigaeth gyfan yw symud ein poblogaeth ymlaen o ffermio ymgynhaliol i fusnesau sy'n gwneud arian.

Rhwng 2018 a 2023, roedd ein gweithgareddau yn canolbwyntio ar gryfhau a chynyddu gallu aelwydydd amaethyddol i dyfu cnydau allweddol fel casafa a reis. Yn y cyfnod hwn, buom yn hyfforddi tua 2,000 o aelwydydd mewn arferion ffermio da, rheoli clefydau a phlâu y prif gnydau a defnyddio, cynhyrchu a chadw hadau o ansawdd da.

Byddwn yn parhau i weithio gydag aelwydydd amaethyddol yn 2024, a’n prif flaenoriaeth fydd cyfreithloni ein cymdeithas. Yn sgil hynny, gallwn wedyn ystyried prosiectau mawr, sy’n fwy o faint ar gyfer ein poblogaeth yn y dyfodol.

Wrth fwrw ymlaen yn 2025, hoffem gymryd ychydig mwy o ran mewn prosiectau datblygu. Rydyn ni’n bwriadu lansio prosiect sy’n cylchdroi credyd ar gyfer prosiect da byw bach a mawr, er mwyn diwallu angen y farchnad am gig. Mae'r cyflenwad lleol o gig yn fach iawn ac nid oes gan aelwydydd gwledig ddigon o dda byw mwyach: mae yma gyfle a brys i fynd i'r afael â hyn. Hoffem hefyd lansio'r prosiect Hadau i Bawb fel y gellir cynhyrchu hadau o ansawdd da ar raddfa fawr i’w darparu i aelwydydd sydd wedi bod yn cynaeafu hadau o'r un cnydau ers mwy na degawd - dyma un o'r rhesymau pam mae llai o gnwd ac ansawdd y cynnyrch yn gwaethygu.

Beth bynnag, mae rhai cyfyngiadau mawr yn dal i herio CN+. Yn eu plith mae logisteg ansefydlog; yr angen i hyfforddi aelodau mewn rhai meysydd allweddol; a gorfod dibynnu ar ein hadnoddau ariannol ein hunain, sydd weithiau'n annigonol i ateb ein huchelgais.

Felly, rydyn ni wedi dechrau chwilio am bartneriaid posibl i’n helpu (a) i gyflymu ein gwaith a (b) i wireddu’r uchelgeisiau sydd gennym ar gyfer heddiw ac yfory. Felly, dyma achub ar y cyfle hwn i ofyn yn daer am gymorth unrhyw unigolyn neu sefydliad yn y DU a hoffai ein cefnogi – cysylltwch â ni cyn gynted â phosib, drwy anfon e-bost at olygydd y cylchgrawn Pobl Dewi. (editorpd@churchinwales.org.uk)