Tocio am Dyfiant – Cam Pedwar
Paul Mackness, Cadeirydd y Grŵp Garddio Tocio am Dyfiant, sy’n edrych ymlaen wrth i'r cam olaf yn y broses ddechrau.
Erbyn i chi ddarllen yr erthygl hon, bydd argymhellion Cam Tri gan y Grŵp Garddio Tocio am Dyfiant wedi cael eu cylchredeg i bob Cyngor Ardal Gweinidogaeth Leol. Cam Tri yw cam ymgynghori olaf Tocio am Dyfiant ond mae'n canolbwyntio'n fwy ar sicrhau bod y ffeithiau rydyn ni’n seilio ein hargymhellion arnyn nhw yn gywir. Sylwch fod ein hargymhellion yn seiliedig ar yr hyn a ddywedoch chi wrthym am eich eglwysi.
Fel rhan o Gam Tri bydd rhai eglwysi yn cael eu nodi fel lleoedd y dylid gweld twf a lle y dylid cyfeirio adnoddau, bydd rhai yn anffodus yn cael eu nodi fel rhai i’w cau, a bydd nifer o eglwysi yn cael eu nodi fel rhai i aros ar agor a rhai yn cael eu dynodi fel rhai i'w hadolygu yn y dyfodol.
Mae'r categori olaf hwn yno i sicrhau bod y mesurau y dywedoch eich bod am eu rhoi ar waith yng Ngham Dau yn digwydd a beth yw effaith y camau hynny. Ar ôl adolygiad da gellir nodi eglwys fel un sydd ar agor, ond y bydd yn cau os na fydd twf yn cael ei weld, neu gellid cynnal adolygiad pellach os yw'n rhy gynnar i ddweud. Gallai'r cyfnodau adolygu hyn fod ar ôl un, dwy, tair, pedair neu bum mlynedd.
Mae'n bwysig bod yr argymhellion sy'n ymwneud ag eglwysi unigol yn cael eu hadlewyrchu a'u trafod gan eu pwyllgorau eglwysig a dylai unrhyw adborth adeiladol gael ei fwydo yn ôl i'ch Cyngor Ardal Gweinidogaeth Leol a fydd hefyd yn trafod yr argymhellion ac yn cyflwyno ymateb ysgrifenedig ffurfiol i'r Grŵp Garddio.
Gadewch i mi fod yn hollol glir - ni fydd eglwysi unigol na Chynghorau Ardaloedd Gweinidogaeth Leol yn gallu rhoi feto ar argymhellion. Ond os ydyn ni’n cael rhywbeth ffeithiol o'i le neu os ydych chi'n teimlo ein bod wedi camddehongli'r hyn a ddywedoch chi wrthym, byddwn yn eu hailystyried yng Ngham Pedwar, pan fyddwn yn gwneud ein hargymhellion terfynol i'r Esgob, yr Uwch Staff, Bwrdd Cyllid yr Esgobaeth, y Pwyllgor Sefydlog a'r Pwyllgor Eglwysi a Bugeiliol.
Mae'n ofynnol i Ardaloedd Gweinidogaeth Leol gyflwyno eu hymatebion i'w Harchddiacon erbyn 30 Ebrill 2026. (Da chi, peidiwch â chwyno bod hyn yn digwydd yn ystod y Grawys – mae'r Grawys yn amser i fyfyrio a dyna’r hyn rydyn ni'n gofyn i chi ei wneud.) Mae Deoniaid a Chadeiryddion Ardaloedd Gweinidogaeth Leol wedi cael eu briffio am y broses a'r amserlen. Ni fydd methiant Ardal Gweinidogaeth Leol i gyflwyno ymateb yn atal symud i Gam Pedwar.