GDg(Ll) Parch. Beth Davies

Profiad Bythgofiadwy

Ar ôl bod yn ddarllenydd lleyg am flynyddoedd ac yn cymryd gofal yr eglwysi lleol pan nad oedd ficer o fewn y plwyf, yr awgrym gan lawer o`r aelodau oedd i mi gael fy ordeinio. O fewn fy swydd fel athrawes a pharatoi ar gyfer y Sul, doedd dim llawer o amser i wneud dim byd arall ac roedd y syniad o fynd i ffwrdd i astudio am ychydig o flynyddoedd yn amhosibl. Mae fy nghalon i yma yng nghefn gwlad lle rwyf wedi cael fy ngeni a`n magu.

Braint o`r mwyaf oedd cael fy ordeinio yn ddiacon yn 2016 a bod yn gurad yn ardal fy magwraeth. Ymhen dwy flynedd, ar ôl llawer iawn o brofiadau gwerthfawr, cefais y cyfle breintiedig i fod yn offeiriad llawn amser, ac yn wir roedd hyn yn fraint o`r mwyaf. Roedd dysgu yn rhan bwysig o mywyd ac roeddwn yn hoff iawn o gael gweithio yng nghwmni plant, ond roedd yr alwad mor gryf fel nad oedd posibl troi`r cyfle i lawr.

Roedd newid cwrs bywyd yn brofiad bythgofiadwy ac yn anodd iawn, ond roedd gwasanaethu ymysg ffrindiau yn hyfryd a chefais yr holl gefnogaeth gan aelodau`r eglwysi.

Daeth tro ar fyd yn fuan iawn yn 2020 a chefais fy ngalw i fod yn ddeon bro ac offeiriad plwyf mewn ardal arall. Ie, cyfle gwych OND ar ôl dau Sul o wasanaethu fe ddaeth COVID i`n rhan a minnau hyd yn oed heb gymryd gwasanaeth mewn pob un o`r chwe eglwys. Hunllef gan nad oeddwn yn adnabod llawer a heb unrhyw gysylltiad â nhw. Ar y pryd camgymeriad mawr oedd derbyn yr alwad ac felly y bûm yn teimlo am sawl mis. Rhaid i mi ddweud diolch am wasanaeth Zoom a dyna lle y cefais i gwrdd â llawer o`r aelodau am y tro cyntaf un. Roeddwn wedi gorffen dysgu hefyd ac roedd yna hiraeth mawr gan nad oeddwn yn medru mynd i mewn i ysgolion y plwyf.

Ond gyda gras a chymorth Duw mae fy mywyd erbyn hyn yn llawn breintiau a hyfrydwch gydag aelodau'r chwe eglwys. Mor gefnogol a da yw cael cydweithio a chymdeithasu o fewn ardaloedd newydd er yr hiraeth o beidio bod yn rhan o eglwysi fy magwraeth, ond mynd y mae amser a newid y mae`r byd ac os ydych chi`n barod i wrando ar alwad Duw fe ddaw pethau amhrisiadwy i`ch bywyd .