Arian ar gyfer Popeth
Mae erthygl ddiweddaraf Theresa Haine yn dangos pwysigrwydd sicrhau mai rhywbeth i bawb yw datblygiad
Rwyf wedi dychwelyd yn ddiweddar o ymweliad mis o hyd â Madagascar, a phan oeddwn i yno fe ges i gyfle i ymweld â thref ar yr arfordir gorllewinol o'r enw Maintirano. Mae'n dref gymharol fawr, ond erbyn hyn dim ond lorïau mawr sy'n gallu teithio ar hyd y "ffordd", sy'n llawn creigiau, ffosydd a llynnoedd mwd o ddyfnder anhysbys.
Yr unig ffordd arall o gyrraedd y lle yw trwy'r awyr, ac fe wnaethon ni hedfan yno mewn awyren fach tair sedd. Mae'n amlwg nad yw hediadau yn digwydd yn rheolaidd, oherwydd wrth adael fe wnaethom ni sylwi bod y rhedfa yn un o'r prif ffyrdd i mewn i'r dref. Mae seiren fyddarol yn canu hanner awr cyn i unrhyw awyren lanio neu esgyn, ac mae dyn yn sicrhau bod pob cert bustach, beic, ricshaw, cerddwr, gafr a'r lori achlysurol yn gadael y ffordd ar unwaith – dim ond ym Madagascar y gallai hynny ddigwydd!
Y rheswm am yr ymweliad hwn â Maintirano oedd gŵyl dri diwrnod i ddathlu 20 mlynedd o weithio gydag Arian i Madagascar a deng mlynedd ar hugain o weithio gyda SAF/FJKM, adran ddatblygu'r Eglwys Brotestannaidd Unedig.
Pan sefydlwyd SAF 50 mlynedd yn ôl, roedd llawer o bobl yn teimlo y dylai datblygiad SAF fod ar gyfer aelodau'r eglwys yn unig, ond roedd aelodau pwyllgor SAF yn credu'n gryf mai rhywbeth i bawb yw datblygiad, nid aelodau'r eglwys yn unig. Fe welais i bwysigrwydd yr egwyddor hon yn glir iawn yn ystod yr ymweliad hwn pan gawsom gyfle i gyfarfod â dau grŵp o fenywod Mwslimaidd cyfeillgar a chroesawgar iawn a oedd yn codi arian trwy fridio geifr a hwyaid diolch i gymorth y rhaglen SAF.
Fe wnaethon nhw ddangos eu praidd o tua 20 o eifr gan gynnwys sawl myn gafr, a gwelsom fwy mewn cae cyfagos ar ein ffordd allan. Roedd yr hwyaid mewn lloc gymharol fawr heb bwll ond gyda thanc o ddŵr iddyn nhw gael sblasio. Roedd gan y menywod fynediad at ficro-gredyd ac roedden nhw'n ddiolchgar iawn am yr holl gymorth roedd SAF yn gallu ei roi iddyn nhw. Diolch i'r cynllun micro-gredyd roedden nhw'n gallu talu am fwyd ac addysg i'w plant.
Mae SAF, trwy gyllid Arian i Madagascar, yn cefnogi 17 grŵp o fenywod yn bennaf sy'n plannu miloedd o goed, yn tyfu llysiau, yn cynnal marchnad dan orchudd, yn gwneud basgedi hardd i'w gwerthu, a llawer o weithgareddau eraill sy'n creu incwm. Roedd yn bleser ymweld â nhw a gweld sut mae ein harian yn cael ei ddefnyddio cystal.