Achubwyr Bywyd ar Ddwy Olwyn

Ledled Cymru, mae criw rhyfeddol o wirfoddolwyr yn gwneud byd o wahaniaeth, gan ddarparu cyflenwadau meddygol hanfodol a helpu i achub bywydau. Mae Stephen Grylls yn un ohonyn nhw.

Mae Beiciau Gwaed Cymru yn darparu gwasanaeth negesydd hanfodol y tu allan i oriau i'r GIG, gan gludo gwaed, plasma, llaeth y fron, a chyflenwadau meddygol hanfodol eraill. Mae ganddyn nhw genhadaeth syml ond hanfodol: sicrhau bod gan ysbytai a chyfleusterau gofal iechyd o Fôn i Fynwy y cyflenwadau brys sydd eu hangen arnyn nhw, yn rhad ac am ddim, gan leddfu'r baich ar y GIG a gwella gofal cleifion.

Dechreuodd y stori yn 2011. Gan gychwyn gyda dim ond ychydig o feiciau a llond llaw o feicwyr ymroddedig, fe wnaeth Beiciau Gwaed Cymru ddatblygu'n gyflym diolch i gefnogaeth y gymuned ac effaith ddiamheuol eu gwaith.

Hyd yma, mae Beiciau Gwaed Cymru wedi gwneud ychydig dros 50,000 o ddanfoniadau. Mae'r ffigurau trawiadol hyn yn adlewyrchu nid yn unig ymroddiad y gwirfoddolwyr ond hefyd yr angen hanfodol am eu gwasanaeth. Mae pob darpariaeth yn cynnig achubiaeth i gleifion mewn angen.

Mae gan yr elusen 560 a mwy o wirfoddolwyr, gan gynnwys gyrwyr, rheolwyr a chodwyr arian, pob un yn rhoi o'u hamser a'u sgiliau i gadw'r gwasanaeth i redeg yn esmwyth. Maen nhw'n dod o bob cefndir ac mae eu hymrwymiad yn ddiwyro, gan weithio drwy'r nos yn aml, ar wyliau banc ac mewn tywydd garw i sicrhau bod cyflenwadau tyngedfennol yn cyrraedd pen eu taith mewn da bryd.

Mae Beiciau Gwaed Cymru wedi ehangu ei rwydwaith cymorth critigol i gynnwys casglu a dosbarthu samplau Sepsis-positif o ysbytai ar fyrder ledled ysbytai'r De. Gyda sepsis, cyflwr sy’n gallu peryglu bywyd ac sy'n cael ei achosi gan ymateb y corff i haint, rhaid wrth ddiagnosis a thriniaeth gyflym i wella canlyniadau cleifion. Gan gydnabod y brys hwn, mae Beiciau Gwaed Cymru wedi symleiddio eu gwasanaeth i sicrhau bod y samplau hanfodol hyn yn cyrraedd labordai yn gyflym i'w dadansoddi'n brydlon ar draws Bwrdd Iechyd Hywel Dda.

Mae integreiddio Beiciau Gwaed Cymru i brotocol diagnosis o Sepsis yn enghraifft o'r cydweithio rhwng gwasanaethau gofal iechyd a sefydliadau gwirfoddol. Mae eu cyfraniad nid yn unig yn gwella cyflymder ymyriadau meddygol ond hefyd yn lleddfu peth o'r pwysau logistaidd sy'n wynebu ysbytai, yn enwedig yn ystod oriau brig neu ar adegau o argyfwng.

Mae hyn yn tynnu sylw at rôl hanfodol gwasanaethau gwirfoddol ym maes gofal iechyd, gan ddarparu ateb cludo dibynadwy a chyflym sy'n sicrhau bod cleifion yn derbyn y gofal amserol sydd ei angen arnyn nhw, gyda hyn yn ei dro yn achub bywydau.

Mewn byd lle gall amser olygu'r gwahaniaeth rhwng byw a marw, mae Beiciau Gwaed Cymru yn cynnig gobaith mawr ei angen. Diolch i’w hymdrechion diflino, maen nhw nid yn unig yn darparu cyflenwadau meddygol; ond gobaith, gofal, a dyfodol mwy disglair i bawb hefyd.