Agored i Alffa

Fel rhan o'n hymrwymiad parhaus i Genhadaeth a chefnogi unigolion sy'n archwilio ffydd ac annog credinwyr newydd ar eu taith ysbrydol, mae Alffa yn parhau i fod yn adnodd allweddol yn ein gweinidogaeth i blant, ieuenctid a theuluoedd. Michelle Lloyd sy’n disgrifio ei fanteision mewn dwy gymuned eglwysig ym Mro Aman.

Mae'r cwrs yn darparu amgylchedd croesawgar, glos lle gall cyfranogwyr ddysgu am Dduw y Drindod, pwy yw Iesu, a chael dealltwriaeth well o berson a gwaith yr Ysbryd Glân. Yn ogystal â hyn, mae Alffa o’i hanfod yn meithrin cyfeillgarwch ac yn cynnig blas i gyfranogwyr ar sut beth yw cymuned Gristnogol iach a bywyd eglwysig.

Yn dilyn llwyddiant cyrsiau Alffa y llynedd, a gynhaliwyd mewn partneriaeth â'r Parch Ali yn Eglwys yr Holl Saint a'r Parch Lindy yn y Tymbl, rydw i bellach wedi lansio dau grŵp Alffa newydd yn Llandybie a Phontiets.

Alffa yn Llandybie

Mae sesiynau Alffa Llandybie a gynhelir gan y Parchg Nicola Davies a minnau yn addas i gyfranogwyr a allai fod ag ymrwymiadau eraill yn ddiweddarach yn y dydd. Mae naws cynnes ac agored i’r grŵp gyda sgyrsiau ystyrlon yn datblygu’n naturiol. Mae cyfranogwyr yn ymgysylltu'n gadarnhaol â deunydd y cwrs ac yn dangos chwilfrydedd am ffydd a chred Gristnogol.

Alffa ym Mhontiets

Mae Alffa Pontiets, sy'n cael ei redeg gen i a'r Parch Lindy Morgan, yn elwa ar amgylchedd cartrefol y ficerdy, gan greu gofod cyfforddus ac anfygythiol ar gyfer sgwrs. Mae presenoldeb gwirfoddolwyr yn golygu bod yna gefnogaeth fugeiliol ardderchog ac mae’n helpu i feithrin awyrgylch hamddenol a chlos. Mae'r ddwy fam a’r ddau wirfoddolwr sy'n mynychu wedi mynegi gwerthfawrogiad o’r cyfle i archwilio ffydd mewn lleoliad sy'n teimlo'n ddiogel, yn gyfeillgar a chartrefol.

Ar draws pob lleoliad - yn y gorffennol a'r presennol - mae'r cwrs Alffa yn parhau i chwarae rhan bwysig, gan:

• Gefnogi'r rhai sy'n archwilio Cristnogaeth
• Meithrin credinwyr newydd
• Magu hyder wrth ddeall y Drindod, hunaniaeth Iesu, a'r Ysbryd Glân
• Annog cyfeillgarwch go iawn
• Modelu bywyd cymunedol croesawgar, Crist ganolog

Mae'r ymgysylltu cadarnhaol cyson yn Llandybie a Phontiets yn dangos awydd clir am ddulliau perthnasol o archwilio ffydd sy'n seiliedig ar drafodaeth. Mae Alffa yn parhau i fod yn rhan hanfodol o strategaeth ein gweinidogaeth ac yn offeryn ardderchog ar gyfer annog disgyblaeth a pherthyn o fewn teulu ein heglwys yn ehangach.

Mae lansio Alffa yn Llandybie a Phontiets yn nodi cam calonogol arall ar ein taith i gefnogi twf ysbrydol yn ein cymunedau a'n ffocws ar y Genhadaeth Agored i Dduw. Gyda gwirfoddolwyr ymroddedig, partneriaethau clerigion cefnogol a chyfranogwyr brwd, mae'r ddau grŵp wedi cael dechrau addawol. Gan adeiladu ar gyrsiau ffrwythlon y llynedd, mae'r grwpiau newydd hyn yn parhau i ddangos bod Alffa yn adnodd effeithiol ac ysbrydol ar gyfer tynnu pobl yn nes at Dduw ac at ei gilydd.