Llan Llanast – mae'n gweithio!
Mae menter newydd sbon yn Eglwys Llandybie eisoes yn profi'n boblogaidd gyda theuluoedd o bob rhan o'r ardal leol, yn dilyn ei lansiad swyddogol ym mis Medi.
Tyfodd y syniad yn naturiol o haf prysur a llwyddiannus o Ddigwyddiadau Untro mewn Parciau lleol, lle bu’r Parchedig Nicola Davies a'r Gweithiwr Plant, Ieuenctid a Theuluoedd, Michelle Lloyd, yn treulio amser yn cwrdd â rhieni, mamau cu a thadau cu a phlant mewn lleoliadau awyr agored hamddenol.
Law yn llaw â’r gwasanaethau ysgolion rheolaidd a gynhelir ar draws ysgolion Llandybie, Saron, Tŷ-croes a Bro Banw, roedd y tîm wedi adeiladu cysylltiadau cryf â theuluoedd ymhell cyn i Llan Llanast ddechrau. Mae'r Parch Ali Reeves, Deon Ardal, Ardal Gweinidogaeth Leol Bro Aman hefyd wedi bod yn ymwneud ag allgymorth y parciau a rhai o sesiynau Llan Llanast ac yn ein cefnogi fel tîm gyda’r cyfarfodydd a thrwy weddi rheolaidd.
"Roedd yn teimlo fel y cam naturiol nesaf," meddai Michelle. "Erbyn i fis Medi ddod, roedd teuluoedd eisoes yn ein hadnabod ni - ac roedden ni'n eu hadnabod nhw. Roedd hynny'n gwneud i'r lansiad deimlo'n gyffrous, nid yn frawychus."
Ers agor ei drysau, mae’r sesiwn Llan Llanast fisol wedi gweld twf cyson, gan groesawu hyd at 17 o blant ynghyd â'u rhieni a'u gofalwyr erbyn mis Rhagfyr. Mae teuluoedd sy'n mynychu yn cynrychioli pob un o'r pedair ysgol gynradd leol, gan greu gofod gwirioneddol ar draws y gymuned.
Un o'r datblygiadau mwyaf calonogol oedd cyfranogiad y rhieni eu hunain. Mae sawl mam leol wedi camu i fyny i helpu i baratoi’r celf a chrefft, yn ogystal â chefnogi plant yn ystod y sesiynau gweithgareddau creadigol.
"Mae'r ymdeimlad o waith tîm wedi bod yn wych," ychwanegodd Michelle. "Mae wedi dod yn ofod a rennir - nid yn unig rhywbeth y mae'r eglwys yn ei gynnal, ond yn rhywbeth y mae teuluoedd yn ei lunio’n weithredol."
Crybwyllir yn arbennig Gill, aelod ymroddedig o Eglwys Llandybie sy'n goruchwylio'r lluniaeth a'r bwyd bob mis. Mae ei lletygarwch cynnes wedi creu argraff.
"Mae Gill yn angel cudd,” meddai Michelle. "Allwn ni ddim gwneud hyn hebddi hi."
Mae pethau’n mynd o nerth i nerth a pherthnasoedd cryf yn ffurfio, ac mae Llan Llanast yn debygol o barhau i dyfu fel man cyfarfod llawen, croesawgar yn llawn fydd i deuluoedd ledled yr ardal.