Tocio y Dyfiant
Mae Cam Cyntaf Tocio am Dyfiant wedi'i gwblhau. Beth fydd yn digwydd nesaf? Dyma'r Archddiacon Paul Mackness, cadeirydd y Grŵp Garddio, i nodi'r llwybr ar gyfer y cam nesaf.
Hoffai'r Grŵp Garddio ddiolch i bawb am y modd cadarnhaol y maen nhw wedi ymgysylltu â'r broses. Bydd canlyniadau Cam Un yn cael eu hanfon i bob Ardal Weinidogaeth Leol. Caiff y sgorau eu rhoi mewn degraddau (1-10) a hysbysir yr Ardaloedd pa eglwysi sy'n perthyn i ba ddegradd. Bydd yna ddolen i wefan yr esgobaeth hefyd, lle gall pobl weld sefyllfa eu Hardal mewn perthynas ag eraill ac i’r archddiaconiaethau ar yr amrywiol feysydd pynciol a sgoriwyd. Bydd modd hefyd gweld gwybodaeth esgobaethol ehangach yn ymwneud â'r canlyniadau.
Dylai’r Ardaloedd Gweinidogaeth Lleol fod wedi derbyn ffurflen hefyd, i'w chwblhau gan bob Pwyllgor Eglwysig ar gyfer pob eglwys yn yr Ardal. Dyma'ch cyfle cyntaf i roi eich cyd-destun i ni, eich gobeithion, eich heriau, eich cryfderau a'ch gwendidau ac ati. Gofynnir i eglwysi lenwi’r ffurflen hon a'u dychwelyd i archdeacon.stdavids@churchinwales.org.uk erbyn 30 Ebrill fan bellaf. Byddai'n wych cael ymateb 100%. Fodd bynnag, os na ddaw ymateb, byddwch wedi colli'ch cyfle i adrodd eich stori - ni fydd yn atal y cam cyfweld na'r argymhellion sy'n cael eu gwneud yng Ngham Tri.
Wedyn, bydd y Grŵp Garddio yn defnyddio'r wybodaeth o’r ffurflen i edrych ar linellau ymholi penodol ar gyfer pob eglwys yn yr Ardal. Bydd hyn yn golygu y bydd y cyfweliadau a gynhelir fel rhan o Gam Dau yn canolbwyntio ar gyd-destun penodol yr eglwys dan sylw. Bydd pob eglwys yn cael cyfweliad 20 munud. Mae'n debygol y bydd y rhain yn cael eu cynnal fesul Ardal Fugeiliol o fewn Ardal Weinidogaeth Leol. Cofiwch gadw llygad am y dyddiadau wrth iddyn nhw gael eu cyhoeddi. Nod y Grŵp Garddio yw cwblhau’r holl Gyfweliadau Cam Dau erbyn Cynhadledd yr Esgobaeth ym mis Hydref.
Law yn llaw â'r gwaith hwn, mae'r Grŵp Garddio wedi sefydlu dau weithgor i edrych ar Lywodraethu a Helpu Eglwysi i "orffen yn dda". Bydd y cyntaf yn edrych ar weithio i ddarparu cefnogaeth, hyfforddiant ac adnoddau ar faterion Llywodraethu Ardaloedd Gweinidogaeth Lleol, Ymddiriedolaethau a Sefydliadau Corfforedig Elusennol; bydd yr ail yn edrych ar ffyrdd priodol o ddathlu gweinidogaeth a bywyd adeiladau eglwysig a sut i ganiatáu i'w cynulleidfaoedd ddefnyddio'r adeiladau hynny i "orffen yn dda", gan gydnabod bod cau adeilad eglwys yn golled a bod angen lle ar rai i alaru.