Hyrwyddo Heddwch a Chynaliadwyedd

Mae'r Swyddog Rhyng-ffydd, Shirley Murphy, yn adrodd o Ŵyl Ein Cyfnod Ni, digwyddiad sy'n ymroddedig i ddatblygu cynaliadwy ar draws y sbectrwm ffydd

Yn y DU heddiw, rydyn ni’n ymwybodol o bresenoldeb amrywiaeth grefyddol yn ein bywydau. Mae llawer o gynulleidfaoedd ac aelodau wedi'u lleoli dafliad carreg i ffwrdd o fosgiau, gurudwara, temlau Hindŵaidd, synagogau a vihara.

Yn eu cymunedau lleol, bydd rhai aelodau o'n heglwysi mewn cysylltiad dyddiol â chydweithwyr a chymdogion o wahanol grefyddau, ac mae gan lawer gyfeillion ar draws traddodiadau ffydd.

Mae deall rhyng-ffydd yn hanfodol i fywyd ein heglwysi. Mae angen yr hyder ar bob un ohonom i rannu ein straeon o fewn cymdeithas aml-ffydd. Mae angen cryfhau a darparu adnoddau ar gyfer y rhwydwaith o eiriolwyr/selogion rhyng-ffydd lleol, gan gysylltu â phartneriaid eciwmenaidd.

Mae'n rhaid i ni arfogi Cristnogion ar gyfer byd aml-ffydd heddiw. Credwn fod yn rhaid i'r Eglwys barhau ei phresenoldeb mewn ardaloedd amrywiol, ac ymgysylltu'n gadarnhaol â chrefyddau eraill.

Ddiwedd y llynedd, cynhaliodd aelodau o SGI-UK, (Soka Gakkai International, cymdeithas fyd-eang ar gyfer creu gwerth sy'n seiliedig ar Fwdhaeth Nichiren Daishonin) ŵyl bedwar diwrnod am ddim yn dathlu a hyrwyddo heddwch, addysg, diwylliant a chynaliadwyedd. Cafwyd trafodaethau panel, fforymau, gweithgareddau ar gyfer plant ysgol ac adloniant, gyda’r cyfan yn cael ei gynnal ochr yn ochr â Siarter y Byd ac arddangosfa SGI-UK Hands of Hope and Action, gan ddangos sut y gall pob un ohonom wneud gwahaniaeth go iawn i'r byd.

Cefais wahoddiad i siarad o safbwynt Cristnogol ar y 17 Nod Datblygu Cynaliadwy (SDGs) (https://sdgs.un.org/goals) a luniwyd gan y Cenhedloedd Unedig. Un o'r rhain yw dileu tlodi; un arall yw dim newyn sy'n cael ei wneud mewn llawer o'n heglwysi sy'n cynnal banciau bwyd, ceginau cawl, clybiau brecwast etc.

Gallwn fel unigolion ac eglwysi wneud newidiadau yn ein bywydau ein hunain - gartref, yn y gwaith ac yn y gymuned - drwy gefnogi ffermwyr neu farchnadoedd lleol a gwneud dewisiadau bwyd cynaliadwy ac ymladd gwastraff bwyd. Mae'r rhan fwyaf o'n heglwysi bellach yn defnyddio coffi, te a bisgedi Masnach Deg. Mae ein cyfranogiad yng nghynllun Eglwysi ECO hefyd yn cwmpasu un arall o'r Nodau Datblygu Cynaliadwy, yn ogystal ag Uwchgynhadledd Adfer Afonydd Cymru a gynhaliwyd gan yr Eglwys yng Nghymru a oedd yn canolbwyntio ar ddyfrffyrdd a phwysigrwydd afonydd glân, diogel i'n hiechyd a'n hecosystemau.

Mae Nodau Datblygu Cynaliadwy yn lasbrint ar gyfer dyfodol gwell, mwy cynaliadwy i bawb. Maen nhw i gyd yn rhyng-gysylltiedig ac, er mwyn sicrhau nad oes neb yn cael ei adael ar ôl, mae'n bwysig ein bod yn eu cyflawni erbyn 2030.

Yn olaf, fel eglwysi mae angen i ni annog cydweithio rhwng cymunedau ac awdurdodau lleol i godi ymwybyddiaeth y cyhoedd a sbarduno gweithredu lleol i gyflawni rhai o'r nodau hyn fel unigolion ac eglwysi a thrwy hynny hyrwyddo heddwch, gan gydweithio i sicrhau cynaliadwyedd. Mae rhyngweithio cydweithredol yn allweddol.