Atgofion Darllenydd wedi ymddeol
Rhan 1
Rhaid i bob peth da ddod i ben' medden nhw a mis Rhagfyr diwethaf, ar ôl dros 30 mlynedd fel Darllenydd trwyddedig yn yr esgobaeth, penderfynodd Anna Bement ei bod hi'n bryd hongian ei sgarff las ac ymddeol.
Ym mis Medi 1994 cefais fy nhrwydded gan yr Esgob Ivor a gwisgais y sgarff las honno am y tro cyntaf yn Eglwys Dewi Sant, Hubberston, lle traddodais fy mhregeth gyntaf.
Roedden ni newydd ddychwelyd i Gymru o Rydychen lle gwnes fy hyfforddiant o bell. Roedd hyn yn cynnwys mynychu darlithoedd ac ysgrifennu traethodau diwinyddol yn y llyfrgell yn Neuadd Wycliffe lle roedd fy ngŵr Peter yn astudio ar gyfer cael ei ordeinio. Ers hynny, mae hyfforddiant i fod yn Ddarllenydd wedi dod yn llawer mwy trwyadl, fel y dylai fod!
Roedd y rheithor yn Hubberston yn gymorth mawr, a rhoddodd gyfleoedd lawer i fi bregethu, gan fy annog i ddatblygu gweinidogaeth ehangach. Roedd hyn yn cynnwys sefydlu grŵp ieuenctid ac Astudiaeth Feiblaidd i Ferched yn ogystal ag arwain gwasanaethau ar y Sul.
Pan benodwyd Peter yn ficer ym mhlwyf Llandeilo Fawr, dechreuodd fy ngweinidogaeth o ddifri (mae yna fanteision i fod yn briod â'r ficer!). Cefais fy annog i arwain a phregethu mewn amrywiaeth o wasanaethau yn y plwyf a thu hwnt – gan gynnal y Foreol Weddi a’r Hwyrol Weddi, Gwasanaethau Teulu, gwasanaethau Gweddi a Mawl misol ac er mawr lawenydd i mi, Gwasanaeth Ieuenctid achlysurol. Datblygodd hyn yn sgil cwrs conffyrmasiwn roeddwn i’n ei gynnal o dan arweiniad Peter, ac a ddatblygodd yn grŵp ieuenctid GIG (Growing In God).
Felly beth yn union yw Darllenydd yn yr Eglwys yng Nghymru? Mae fy nhrwydded 1994 yn awdurdodi'r Darllenydd i:
- Ddarllen y foreol weddi a’r hwyrol weddi
- Darllen Gweinidogaeth Gair y Cymun Sanctaidd Ewcharist Sanctaidd
- Pregethu yn y gwasanaethau uchod
- Darllen y Litani
- Derbyn a chyflwyno offrwm y bobl
- Cyhoeddi gostegion priodas
- Ymgymryd â gwaith bugeiliol ac addysgol o'r fath a chynorthwyo offeiriad plwyf.
Mae'r holl agweddau hyn ar y weinidogaeth yn cael eu goruchwylio gan Warden y Darllenwyr sydd bob amser ar gael am gymorth ac arweiniad. Mae'r Gynhadledd Darllenwyr flynyddol, sesiynau CMD (Datblygiad Gweinidogaeth Parhaus), Hyfforddiant Diogelu, a chylchgrawn ardderchog, The Reader, i gyd ar gael fel rhan o ddatblygiad a dysgu parhaus y Darllenydd.
Mae llawer o bobl yn meddwl bod Darllenwyr ddim ond yno i 'lenwi' absenoldeb y periglor, ac yn wir mae llawer o fy ffrindiau sy’n Ddarllenwyr wedi dweud bod hyn yn aml yn wir. Ond mae cymaint mwy y caniateir i Ddarllenydd trwyddedig ei wneud y tu hwnt i’r gwasanaethau addoli.
Mae’n gyfnod anodd i'r Eglwys gydag offeiriaid yn aml o dan bwysau o bob cyfeiriad, nid yn unig ar y Sul, i ddiwallu anghenion ysbrydol a bugeiliol eu pobl. Rwy'n credu bod gweinidogaeth leyg, a gweinidogaeth Darllenydd yn arbennig, yn rhan o'r ateb. Felly fy ngobaith yw y bydd yr erthygl hon yn annog unrhyw un allan yna a allai deimlo eu bod yn cael eu galw, ond efallai nid i weinidogaeth ordeiniedig, i brofi beth allai'r alwedigaeth honno fod.
I'w barhau