Gofod Cysegredig
Ann Bulley sy’n disgrifio ei hymgysylltiad misol â thawelwch yng Nghwm Gwaun
O'r brif ffordd, mae'r trac yn mynd i mewn i goetir ac yn ymdroelli'n dawel tuag at eglwys fach mewn llannerch, ac rwy'n mynd i mewn i ofod trosiannol. Dyma eglwys Dewi Sant, Llanychâr, a minnau wedi bod yn gwneud y daith hon, unwaith y mis, am y 6-7 mlynedd diwethaf.
Yn y gwanwyn mae'r fynwent wedi'i gorchuddio yn gyntaf gydag eirlysiau, ac yna briallu, yna clychau'r gog a blodau neidr. Mae cân yr adar yn atseinio o'r coed cyfagos ac mae su bwrlwm pryfed yn y cefndir. Yn ddiweddarach yn y flwyddyn, mae'r eglwys a'i chyffiniau yn parhau i gynnig ymdeimlad o heddwch a thawelwch i bawb sy'n dod yma, fel y nodir gan y sylwadau amrywiol yn llyfr ymwelwyr yr eglwys.
Dechreuais ddod yma pan oeddwn i’n chwilio am fath o gyfarfod eglwys a oedd yn cofleidio myfyrdod tawel ond hefyd yn rhoi cyfle i fyfyrio ar agweddau ar fy ffydd gydag eraill mewn ffordd greadigol. Dydy ein cynulliadau ni ddim yn wasanaethau ac maen nhw’n cael eu harwain gan leygion. Dydyn nhw ddim yn cynnwys pregeth na sacrament ac anaml y maen nhw’n cynnwys canu er, ar adegau, gall cerddoriaeth gael ei chynnwys.
Yn hytrach, mae ein grŵp bach, fel arfer tua phedwar i bump o bobl, yn eu tro yn cyflwyno myfyrdod ysbrydol ar thema o'u dewis. Mae pynciau ein myfyrdod wedi cynnwys pynciau Beiblaidd fel y Bregeth ar y Mynydd a Doniau’r Ysbryd Glân, yn ogystal â meddyliau sy'n ymwneud ag adegau arbennig o'r flwyddyn fel y Cynhaeaf a Deuddeg Diwrnod y Nadolig. Fodd bynnag, gallan nhw hefyd gynnwys pynciau sy'n berthnasol i'r hyn sy'n digwydd yn y byd, fel Duw yn y Tywyllwch.
Rydyn ni wedi ystyried y berthynas rhwng gweddi a phersonoliaeth ac wedi cymryd amser i fyfyrio ar farddoniaeth Gristnogol o wahanol ganrifoedd. O dro i dro, rydyn ni wedi cael ein herio i ystyried sut y gall yr eglwys ymgysylltu mewn ffyrdd mwy perthnasol a chadarnhaol gyda'n cymunedau lleol. Mae pob cyfarfod yn gorffen gydag amser o weddi sy'n cynnwys y ceisiadau gweddi a adawyd ar goeden weddi'r eglwys gan ymwelwyr.
Mae fy mhererindod fisol i'r lle sanctaidd hwn bellach yn rhan allweddol o'm hymarfer ysbrydol. Mae gallu rhannu meddyliau a syniadau, llawenydd a gofidiau, heriau a bendithion mewn lle diogel gyda cheiswyr eraill yn fraint ac yn ysbrydoliaeth. Mae gofodau o'r fath yn brin yn y byd sydd ohoni ac mae eu hangen yn fawr ar gyfer iechyd a chyfanrwydd ysbrydol.