Achubiaeth diolch i’r loteri

Mae rhaglen Pawb a’i Le Cronfa Gymunedol y Loteri Genedlaethol wedi dyfarnu £398,078 i ariannu prosiect Cymunedau Cysylltiedig Plant Dewi. Ac mae'r rheolwr Catrin Eldred wrth ei bodd.

Bydd y grant hwn yn ein galluogi i barhau gyda'n Grwpiau Teuluoedd Gyda'n Gilydd yng Nghwmgors a Cross Hands ac ehangu’r cynnig hwn ym Mrymaman, Llanymddyfri a Hendy-gwyn ar Daf ac i barhau gyda'n Grwpiau Rhieni Ifanc yn Rhydaman a Chaerfyrddin am y tair blynedd nesaf.

Bydd ein grwpiau, sy’n rhedeg ar hyn o bryd am ryw awr a hanner i ddwy awr, yn cael eu hymestyn i dair awr, gan sicrhau y bydd cysylltiadau hanfodol yn cael eu gwneud ymhlith y cymunedau rydyn ni’n gweithio ynddyn nhw er mwyn cysylltu teuluoedd â'u hardal leol.

Bydd mwy o gefnogaeth hefyd ar gael trwy ein cynnig un-i-un i rieni dan 26 oed, gan roi cyfle iddyn nhw weithio gyda phobl allweddol i symud ymlaen a chysylltu â'u grŵp cymorth teuluoedd lleol a'u cymuned leol.

Drwy weithio gyda theuluoedd a chymunedau lleol, byddwn hefyd yn cynnal digwyddiadau cymunedol i ddod â phobl at ei gilydd i fwynhau'r hyn sydd ar gael yn lleol.

Trwy'r prosiect hwn rydyn ni am leihau arwahanrwydd, cynyddu hyder, datblygu sgiliau a gwella perthnasoedd y teuluoedd a’r cymunedau rydyn ni’n gweithio gyda nhw.

Ddydd Gwener, 25 Hydref, cynhaliwyd ein digwyddiad lansio a dathlu, gan ddod â theuluoedd o rai o'n grwpiau presennol, partneriaid a chefnogwyr o bob cwr o'r sir ynghyd, ynghyd â'n gwestai arbennig - Ann Davies, AS Caerfyrddin. Roedd yn gyfle i rannu ein gweledigaeth ar gyfer y gwaith a phwysleisiodd Ann Davies bwysigrwydd mentrau o'r fath, yn enwedig wrth weithio gyda theuluoedd sy'n wynebu anawsterau a heriau amrywiol, nad oes ganddyn nhw weithiau unman arall i droi.

Siaradodd Chloe, mam sy'n mynychu un o'n Grwpiau Teuluoedd Gyda'i Gilydd, am ei phrofiadau a sut roedd y grŵp wedi dod yn deulu estynedig iddi. Mae ei merch hefyd wedi gwneud ffrindiau wrth fynychu'r grŵp, sydd wedi bod yn rhan annatod o'u bywydau dros y ddwy flynedd ddiwethaf.

Heb y gefnogaeth hon gan y Loteri Genedlaethol, fyddai ein grwpiau ddim yn gallu parhau i wasanaethu a chefnogi'r nifer fawr o deuluoedd sy'n eu defnyddio wythnos ar ôl wythnos.

Am ragor o wybodaeth, cysylltwch â Plant Dewi ar 01267 221551, info@plantdewi.co.uk neu ewch i'n gwefan https://www.plantdewi.org.uk/cy/hafan/