Rhown Ddiolch

Rydyn ni fel Ysgol Penboyr yn cystadlu yn flynyddol yng Nghystadleuaeth Menter Ysgolion y Dreftadaeth Gymreig. Eleni, penderfynwyd dysgu am ŵr gafodd ei eni dafliad carreg o’r ysgol – sef Griffith Jones. Ar ôl darganfod ei fod wedi llunio emynau, cawsom syniad o greu emyn ysgol newydd. Lansiwyd ein hemyn o flaen yr Esgob newydd, y Gwir Barchedig Dorrien Davies yng Nghadeirlan Tyddewi. Hefyd, buom yn astudio bywyd a gwaith Madam Bevan yn rhan o’n prosiect. Enillodd yr ysgol un o brif wobrau’r gystadleuaeth a derbyn rhodd ariannol o £800 mewn seremoni yn y Llyfrgell Genedlaethol.

Dyma’r linc i’n prosiect buddugol sydd ar wefan Ysgol Penboyr o dan y pennawd Cymru Cenedl Fwyaf Llythrennog y Byd?

Rhown Ddiolch

Rhown ddiolch, Dduw, am ffrindiau,

Am gymorth i rai bach,

Am bob un gair caredig,

Am wên ac awyr iach,

Ac am gael bod yn deulu dedwydd

Wrth inni ddysgu gyda’n gilydd.

Cytgan:

Rhown ddiolch am ein haddysg

Sy’n cyfoethogi’r daith,

Rhown ddiolch am synhwyrau

Am gariad ac am ffrindiau,

Am werth ein hysgol ninnau,

A diolch yn ein hiaith.

Rhown ddiolch am fyd natur

O’n cwmpas ym mhob man,

Ac am atgofion melys,

A phawb yn gwneud eu rhan,

Am inni weld fod pawb yn cyfri

Ym mhennod newydd hen, hen stori.