Yn ei erthygl ddiweddaraf, mae Matt Webster yn ystyried rhannu rhythm bywyd ac yn edrych ymlaen at ŵyl haf
Yn fy erthygl gyntaf, cyflwynais Gymuned y Ffordd - ein cymuned fynachaidd sydd wedi'i gwreiddio yn Llansteffan, ac wedi’i sefydlu ar sylfaen gweddi, symlrwydd a lletygarwch radical. Y tro hwn, dwi am rannu mwy am ein hymdeimlad o genhadaeth - sut y gall bywyd myfyriol hefyd fod yn un o ymgysylltiad dwfn â'r byd o'n cwmpas.
Mae bywyd mynachaidd weithiau'n cael ei gamddeall i olygu encilio o'r byd. Ond i ni, mae'n ymrwymiad i fod yn bresennol - i Dduw, i'n gilydd, ac i'r gymuned rydyn ni'n byw ynddi. Mae'r Rheol sy'n ein tywys yn ein galw i groesawu'r rhai sy'n ceisio heddwch neu fyfyrio - nid yn ddifeddwl, ond gyda sylw, ffiniau a pharch. Nid yw'n ymwneud â chynnig atebion cyflym, ond rhannu rhythm bywyd lle gall cariad gael ei adnabod yn y cyffredin.
Mae llawer o'n cenhadaeth yn digwydd yn dawel: eistedd gyda rhywun dros gawl a bara, cerdded llwybr yr aber gyda ffrind, neu yn syml gwrando, neu ymgynnull am dân wrth iddi wawrio ar y traeth - gweledigaeth o weddi sy’n seiliedig ar rythmau’r llanw a’r golau. Mae eiliadau fel yna yn helpu i lunio sut rydyn ni'n byw nawr.
Mae peth o'n gwaith estyn allan wedi'i leoli yng Nghaerfyrddin, lle rydyn ni’n cydweithio â sefydliadau sy'n cefnogi pobl sy'n byw trwy dlodi, dibyniaeth, neu drallod meddyliol. Mae'r achosion hyn o gyfeillgarwch yn cael eu hadeiladu'n dyner ac yn barchus. Nid darparwr gwasanaethau yw’r mynachdy - aelwyd o weddi ydyw, ac mae'r rhai sy'n ymuno â ni yn dod yn rhan o'i rythm, hyd yn oed am gyfnod byr.
Rydyn ni hefyd yn gweld ein perthynas â'r tir fel rhan o'n cenhadaeth. Trwy Brosiect Glasbren yn Lord'sPark Farm, mae cyfleoedd i helpu i dyfu bwyd, cadw gwenyn, ac ymuno â'r byd amaeth a gefnogir gan y gymuned. Mae'n araf, yn ddaearol, ac yn cael ei rannu. Fel y gwnaeth y pab Ffransis ein hatgoffa, "Mae blodau’r maes a’r adar y gwnaeth llygaid dynol yr Iesu eu gweld a’u gwerthfawrogi bellach wedi eu llenwi a’i bresenoldeb disglair.” Credwn nad stiwardiaeth dda yn unig yw gofalu am y greadigaeth - mae'n ffordd o glosio at Grist.
Yr haf hwn, 9-24 Awst, rydyn ni’n cynnal gŵyl bythefnos wedi'i hysbrydoli gan Gantigl y Creaduriaid gan Sant Ffransis o Asisi sy'n archwilio sut mae mawl, cyfiawnder a gofal am y greadigaeth yn cyd-berthyn. Bydd yr ŵyl yn cynnwys gweithdai ysgrifennu, cyngherddau, noson farddoniaeth meic agored, ac arddangosfa wych a fydd yn cynnwys cerfluniau mawr wedi'u brodio gan Romola Parish. Bydd un penwythnos yn canolbwyntio'n arbennig ar themâu Ffransisgaidd: symlrwydd, heddwch a chydberthynas â'r holl greadigaeth.
I ddysgu mwy neu i gymryd rhan, ewch i www.communityoftheway.org.uk