PCE a'r Arolygydd Eglwysi newydd
Mae Howard Llewellyn yn atgoffa'r rhai sy'n gwneud ceisiadau am ganiatâd i ymgyfarwyddo â'r gofynion ac yn cyflwyno'r Arolygydd Eglwysi newydd
Mae'r Pwyllgor Cynghorol Esgobaethol (PCE) wedi derbyn sawl cais am ganiatâd i gyflawni gwaith adeiladol yn ystod y pandemig. Mae’r ffaith bod llawer ohonoch wedi parhau i ofalu am eich eglwysi, trwy gynllunio ar gyfer eu cynnal a'u gwella a'u cyflawni ar adeg mor anodd, yn wych. Yn ogystal â cheisiadau mae llawer ohonoch wedi cysylltu â Jan Every, Ysgrifennydd PCE a Swyddog Gofal Eglwysi Esgobaethol, i gael cyngor cyffredinol ac i gadarnhau'r categori cywir o ganiatâd, neu ba ddogfennau sy'n ofynnol.
Mae'r PCE yn parhau i gefnogi'r gwaith da ac angenrheidiol sy'n ofynnol ar draws yr esgobaeth ac mae'n dymuno atgoffa ymgeiswyr y dylent ymgyfarwyddo â chynnwys gofynion rhestrau A a B ar gyfer cais am ganiatâd. Bydd nodi'r amodau penodedig ynddynt yn helpu ymgeiswyr i ddeall yr hyn a ganiateir ac na chaniateir o dan y rhestrau priodol. Os na chrybwyllir y gwaith y gwnaed cais amdano yn naill ai Rhestr A neu Restr B yna mae angen caniatâd llawn.
Er mwyn i gais symud ymlaen yn ddi-oed rhaid iddo fod ar gyfer y categori cywir pan gyflwynir ef gyntaf.
Mae Jan bob amser yn hapus i helpu ymgeiswyr i osgoi oedi neu ddryswch ac mae ar gael i'ch cynorthwyo gyda phob agwedd ar geisiadau am ganiatâd. Arfer da fyddai cysylltu â hi (janetevery@churchinwales.org.uk) wrth gynllunio i wneud cais a chyn cyflwyno'r cais.
Yn ddiweddar, ymunodd Frans Nicholas â staff yr esgobaeth [gweler y llun]. Fel Arolygydd Esgobaethol Eglwysi, bydd yn cynnal archwiliadau pum mlynedd a bydd hefyd ar gael i gynnig ei brofiad pensaernïol sylweddol i gynghorau eglwys, AGLl a'r esgobaeth. Mae'n bwriadu cynhyrchu adroddiadau arolygu pum mlynedd sy'n mynd i'r afael â materion technegol mewn ffyrdd dealladwy, ymarferol a realistig wrth ddatblygu ansawdd cyson o gyngor ac arweiniad.
Y bwriad yw y bydd ei adroddiadau nid yn unig yn adroddiadau arolwg technegol ond, lle bo hynny'n briodol, yn sail i gynllun cadwraeth sy'n cynghori ac yn esbonio'r adroddiadau mewn cyd-destun sy'n ein helpu i ddeall arwyddocâd llawn ein heglwysi.
Mae Frans eisoes wedi cychwyn ar ei waith a maes o law bydd mewn cysylltiad â'n holl eglwysi. Os oes gennych unrhyw gwestiynau ynghylch arolygiadau pum mlynedd, cysylltwch ag ef ar FransNicholas@churchinwales.org.uk